2Cor 13 | APE | STEP | Nameitu inaku itulipu ali eke hutoglu bieh atuh. God ananin balan nyetemu ananik buk uli nyakli namudak. Nyakli, “Sapos biech o biech atin elpech chutik enen elpen nyunek enen yowenyimu, orait enyebuk balan wosik iken pukli adulin ali punek skelumen.”

2 Corinthians 13

Echech Korin Imas Chunenek Yologimu Chusuh Krais Ananin Balan Dadag Umu

1 Nameitu inaku itulipu ali eke hutoglu bieh atuh. God ananin balan nyetemu ananik buk uli nyakli namudak. Nyakli, “Sapos biech o biech atin elpech chutik enen elpen nyunek enen yowenyimu, orait enyebuk balan wosik iken pukli adulin ali punek skelumen.” 2 Likuk yanaku yatulipu bieh ali hagikumaguk douk yaklipepaguk dodogowinyi balan. Nameitu douk enyudak yapeik lougun ali yakli igamu inekumepagu enyudak atin balan. Enyudak. Ababuk nyultab ikli inakumogu, echebuk elpech douk likuk chalik chenek yowenyili chanu chanatimaguk echebuk enech elpech, yek eke kobi inek larimech, wak. 3 Abudak nyultab inek stretim-umech abali, ipak eke putik namudak ali pudukemech pukli yek adul Krais isave neyohul yeyagwleh ananin balan. Ali mnek! Krais eke nukwu yek dodogowinu atunu ali nunek stretim umu echebuk elpech douk chenek yowenyili. Eke nukwu yek ali nugilapepamu agundak anan nanubu dodogowinu atunamu. 4 Adul, likuk ababuk nyultab chanu chenek nyilimumanu kruse abali, anan douk wo dodogowinu e, wak. Wakuli God anan douk nanubu dodogowinu atunu uli, ali wata nanahul naitak ali nameitu douk nape. Kobi douk Jisas nape apudak atap ali wo dodogowinamu e, nameitu apak chopuk monek pas anan wata mape apudak atap ali wo dodogowipu e. Wakuli abudak nyultab apak munaku agnabuk Korin abali, Krais eke nunapu mupe munechlepu ali God eke nugakomapu dodogowipamu mugakomu ipak.

5 Ipak atin ati imas punatik ipak yet ali punasolik-agas umu ipak pasuh Diginali ananin balan dadag o wak. Imas punek skel umu ipak yet. Adul, ipak imas pudukemech umu Jisas Krais douk nape ipakiluh apaluh. Douk kobi nunepu pupele, ipak deke kobi pupe ananipu elpech, deke wak. 6 Yek yakli ipak eke punek skel umu apak ali eke punubu pudukemech umu apak adul manubu masuh Krais ananin moul uli. 7 Apak isave masolik God umu nugakomepu ali kobi punek enen yowenyi, wak. Ali apak douk wo munek enyudak umu enech elpech chutulupu ali chukli apak monek ananin moul kalbaluli e, wak. Sapos enech elpech chutulupu chukli apak wo munek moul kalbamu e, enyebuk anyenekech. Apak douk manubu maklimu ipak punek duldulin pasin. 8 Ipak padukemech. Apak eke kobi munek enech echudak umu michageik aduligein balan, wak. Munek moul mugakomen nyutoglu dodogowin atin umu douk wosik. 9 Apak douk monehilau umu meibali nyultab apak wo dodogowipu abali e, ipak douk patoglu dodogowipamu bilip. Ali apak douk masolik God umu nugakomepu punubu putoglu duldulipali elpech pichalakuk kobi likuk palik patoglu duldulipamu. 10 Yek Pol douk Diginali nautuwemu isuh enyudak moul ali neke namba umu ineken. Ali nameitu watak yapeik lougun umu ipak ali yenekumepagu enyudak balan. Umu yakli abudak nyultab ikli inak itoglomepagu abali, yek yakli wak umu didigichiwe otuwe inek stretim umu ipakin pasin, wak. Diginali neke enyudak namba umu igakomepu piyotu dodogowipu atipamu bilip. Wo nukeyen umu inekepu pubihuk e, wak.

Pol Nenemech Gude Echech Korin

11 O yekipu elpech, yek douk enyudak yakli iyatak yekin balan ali yakli ikli, “Yopuhi nyumnah ipak.” Ipak imas punek moul dodogowipu atipu umu putoglu dodogowipamu bilip. Yakli pusuh yekin balan punubu pupe atum boglom ali apaluh hlulu kalbu. God anan douk nanubu bawagas umu agundak ulkwip panosuh kipahechi ali apaluh hlalu kalbu chape kalbamu. Ipak pugimeh namudak kobi yaklimu ali Anan eke nunepu pupe.

12 Yakli ipak atin ati imas pugipech apak God ananipu apakin pasin ali punehilau punokomu loguh. ^{▼▼Bawogenyumu balan nyetemu ganagain balan Grik uli douk nyakli chanoplikech nugwuliluh meyoh. Apakigamu, umu monek sigal umu douk monokomu loguh meyoh.}

Chanatimaguk God ananich elpech chape agundak uli douk chenemepagu gude ipak.

13 Ali yakli Diginali Jisas Krais wosik nugakomepu meyoh. Yakli God anan nunubu ulkum munohwepu ali ananin Michin nyugakomu ipak punatimaguk umu punubu pupe atum boglom.